కారులో ప్రయాణించి గమ్యస్థానానికి చేరుకున్నాక, వాహనం దిగే తొందరలో చాలామంది వెనుక ఏమొస్తోందో గమనించకుండా అకస్మాత్తుగా డోరు తీస్తుంటారు. ఇలాంటి చిన్న పొరపాటు ఎంతటి దారుణమైన ప్రమాదాలకు దారితీస్తుందో చూపే షాకింగ్ వీడియో ఒకటి ప్రస్తుతం సోషల్ మీడియాలో వైరల్గా మారింది. రోడ్డు పక్కన ఆపి ఉన్న కారు డోరును ఒక్కసారిగా తెరవడంతో, వెనుక నుంచి వేగంగా వస్తున్న టూ వీలర్ దాన్ని బలంగా ఢీకొట్టి గాల్లోకి ఎగిరిపడటం ఈ వీడియోలో స్పష్టంగా కనిపిస్తోంది.
ఈ రకమైన ప్రమాదాలను అంతర్జాతీయంగా “డోరింగ్” (Dooring) అని పిలుస్తారు. ముఖ్యంగా ఇరుకైన రోడ్లపై లేదా ట్రాఫిక్ ఎక్కువగా ఉండే ప్రాంతాల్లో కారు సీట్లో కూర్చుని వెనుక వచ్చే వాహనాలను అద్దంలో (Side Mirror) చూడకుండా డోర్ తెరిచినప్పుడు వెనుక వచ్చే బైకర్లు లేదా సైక్లిస్టులు సమయానికి బ్రేక్ వేయలేక ప్రమాదాల బారిన పడుతుంటారు. కొన్ని సందర్భాల్లో కింద పడ్డ వాహనదారులపై వెనుక నుండి వచ్చే ఇతర భారీ వాహనాలు దూసుకెళ్లడం వల్ల ప్రాణాలు కోల్పోయిన సంఘటనలు కూడా ఉన్నాయి.
ఇలాంటి ప్రమాదాలు జరగకుండా ఉండాలంటే కారు దిగే ముందు ప్రతి ఒక్కరూ ఒక చిన్న ట్రిక్ పాటించాలి. దానినే “డచ్ రీచ్” (Dutch Reach) అంటారు. అంటే డోరుకు దగ్గరగా ఉన్న చేత్తో కాకుండా, అవతలి చేత్తో (ఉదాహరణకు కుడివైపు డోర్ తీయడానికి ఎడమ చేతిని వాడటం) హ్యాండిల్ను పట్టుకోవాలి. ఇలా చేయడం వల్ల మన శరీరం సహజంగానే వెనుక వైపుకు తిరుగుతుంది, తద్వారా వెనుక నుండి ఏదైనా వాహనం వస్తోందో లేదో సులభంగా గమనించవచ్చు. మీ ప్రాణాలతో పాటు రోడ్డుపై వెళ్లే ఇతరుల ప్రాణాలను కూడా కాపాడటానికి ఈ చిన్న జాగ్రత్త ఎంతో అవసరం.
