బొల్లారం గ్రామానికి చెందిన గడ్డం దయాకర్ ఇటీవల మరణించడం పట్ల స్థానికంగా తీవ్ర విషాదం నెలకొంది. వారం రోజుల క్రితం ఆయన తుదిశ్వాస విడవగా, ఆ కుటుంబం పెద్ద దిక్కును కోల్పోయి ఆర్థికంగా, మానసికంగా చితికిపోయింది. ఈ విషయం తెలుసుకున్న కాంగ్రెస్ రాష్ట్ర నాయకులు వెల్గాపురి కరుణాకర్ రావు గారు గురువారం బాధిత కుటుంబాన్నిపరామర్శించారు.దయాకర్ కుటుంబ సభ్యులకు తన ప్రగాఢ సానుభూతిని తెలియజేసిన కరుణాకర్ రావు గారు, వారికి తక్షణ సాయంగా కొంత నగదును ఆర్థిక సహాయం రూపంలో అందజేశారు. ఈ సందర్భంగా ఆయన మాట్లాడుతూ.. “దయాకర్ మరణం అత్యంత బాధాకరం. కష్టాల్లో ఉన్న ఈ కుటుంబానికి కాంగ్రెస్ పార్టీ ఎల్లప్పుడూ అండగా ఉంటుంది. కేవలం ఈరోజే కాదు, భవిష్యత్తులో వారికి ఏ అవసరం వచ్చినా నేను వ్యక్తిగతంగా బాధ్యత తీసుకుని సహాయం చేస్తాను” అని భరోసా ఇచ్చారు.గ్రామ సర్పంచ్ వెల్గాపురి రాంబాబు రావు గారు ఈ కార్యక్రమంలో పాల్గొని, గ్రామస్థుడిగా దయాకర్ కుటుంబానికి తమ వంతు సహకారం అందిస్తామని తెలిపారు. ఒక నిరుపేద కుటుంబానికి రాజకీయాలకు అతీతంగా రాష్ట్ర స్థాయి నాయకులు స్పందించి సహాయం చేయడం పట్ల గ్రామస్తులు హర్షం వ్యక్తం చేస్తున్నారు.
