నల్గొండ జిల్లా గుర్రంపోడు మండలంలోని బుడ్డారెడ్డి గూడెం గ్రామంలో ఆధ్యాత్మికతతో పాటు క్రీడా స్ఫూర్తి వెల్లివిరిసింది. గ్రామంలోని కొలువై ఉన్న శ్రీ శ్రీ శ్రీ అభయ ఆంజనేయ స్వామి దేవస్థాన మరియు విగ్రహ ప్రతిష్ట నూతన శీల ధ్వజస్తంభ ప్రతిష్ట మహోత్సవ వార్షికోత్సవం పురస్కరించుకుని గ్రామ పెద్దల ఆధ్వర్యంలో ఏర్పాటు చేసిన కబడ్డీ పోటీలు అత్యంత ఉత్సాహభరితంగా ప్రారంభమయ్యాయి.ఈ క్రీడా వేడుకను గ్రామ సర్పంచ్ సింగం బాలకృష్ణ యాదవ్ మరియు మాజీ సర్పంచ్ బొమ్మ శ్రీను యాదవ్ గారు ముఖ్య అతిథులుగా విచ్చేసి రిబ్బన్ కట్ చేసి అధికారికంగా ప్రారంభించారు. అనంతరం వారు క్రీడాకారులను పరిచయం చేసుకుని, వారికి శుభాకాంక్షలు తెలిపారు.ఈ సందర్భంగా సర్పంచ్ బాలకృష్ణ యాదవ్ మాట్లాడుతూ.. గ్రామాల్లో ఇలాంటి క్రీడా పోటీలు నిర్వహించడం ద్వారా యువతలో ఉన్న ప్రతిభ వెలుగులోకి వస్తుందని అన్నారు. కేవలం భక్తి మార్గమే కాకుండా, శారీరక దృఢత్వం మరియు క్రమశిక్షణనిచ్చే క్రీడలను ప్రోత్సహించడం గ్రామానికి గర్వకారణమని మాజీ సర్పంచ్ బొమ్మ శ్రీను యాదవ్ పేర్కొన్నారు.పాల్గొన్న ప్రముఖులు:ఈ కార్యక్రమంలో గ్రామ ఉపసర్పంచ్ బొల్లం వంశీ, వార్డు సభ్యులు, మాజీ వార్డు సభ్యులు సింగం నరేష్, సింగం ప్రవీణ్ మరియు గ్రామ పెద్దలు విశేషంగా పాల్గొన్నారు. పరిసర ప్రాంతాల నుంచి వచ్చిన క్రీడాకారులు తమ నైపుణ్యాన్ని ప్రదర్శిస్తూ ప్రేక్షకులను అలరించారు. కబడ్డీ పోటీల నిర్వహణపై గ్రామస్తులు హర్షం వ్యక్తం చేస్తున్నారు.
