ప్రముఖ పారిశ్రామిక దిగ్గజం ముఖేష్ అంబానీ నేతృత్వంలోని రిలయన్స్ ఇండస్ట్రీస్ (RIL) 2025-26 ఆర్థిక సంవత్సరం నాలుగో త్రైమాసిక (Q4) ఫలితాలను ప్రకటించింది. ఈ త్రైమాసికంలో కంపెనీ ఏకీకృత నికర లాభం గత ఏడాదితో పోలిస్తే 12.55 శాతం తగ్గి ₹16,971 కోట్లకు పరిమితమైంది. ప్రధానంగా ఆయిల్-టు-కెమికల్స్ (O2C) విభాగంలో ఎదురైన భౌగోళిక రాజకీయ సవాళ్లు, ముడిచమురు ధరల అస్థిరత లాభాలపై ఒత్తిడి పెంచాయి.
లాభం తగ్గినప్పటికీ, ఆదాయం పరంగా రిలయన్స్ పటిష్టమైన వృద్ధిని కనబరిచింది. గత ఏడాదితో పోలిస్తే కార్యకలాపాల ద్వారా వచ్చే ఆదాయం 12.86 శాతం పెరిగి ₹2.98 లక్షల కోట్లకు చేరింది. ముఖ్యంగా రిలయన్స్ జియో, రిలయన్స్ రిటైల్ విభాగాలు అద్భుతమైన పనితీరును కనబరిచి కంపెనీకి అండగా నిలిచాయి. జియో నెట్ ప్రాఫిట్ 13 శాతం పెరగడమే కాకుండా, దాని వినియోగదారుల సంఖ్య 52 కోట్లు దాటడం విశేషం.
ఇక పెట్టుబడిదారులకు ఊరటనిచ్చే అంశం ఏమిటంటే, కంపెనీ బోర్డు ఒక్కో షేరుకు ₹6 చొప్పున డివిడెండ్ను సిఫార్సు చేసింది. లాభాల్లో స్వల్ప తగ్గుదల ఉన్నప్పటికీ, వాటాదారులకు ప్రతిఫలాన్ని అందించడంలో వెనకడుగు వేయలేదు. పూర్తి ఆర్థిక సంవత్సరానికి (FY26) గాను రిలయన్స్ ఏకీకృత నికర లాభం ₹95,610 కోట్లుగా నమోదై రికార్డు సృష్టించింది.
