వెండితెరపై తన నటన, డ్యాన్స్, ఎనర్జీతో లక్షలాది మంది అభిమానులను సంపాదించుకున్న ఎనర్జిటిక్ స్టార్ రామ్ పోతినేని.. నిజజీవితంలోనూ తనకు పెద్ద మనసుందని నిరూపించుకున్నారు. “ఫ్రీడ్రిచ్ అటాక్సియా” (Friedreich Ataxia) అనే ఒక అరుదైన, ప్రాణాంతక నరాల బలహీనత వ్యాధితో బాధపడుతున్న తన లేడీ ఫ్యాన్ కలను రామ్ నెరవేర్చారు. ఆమె తనను కలవాలని ఎప్పటి నుంచో కోరుకుంటోందని తెలుసుకున్న రామ్, ఏమాత్రం ఆలస్యం చేయకుండా స్వయంగా ఆమె ఇంటికే వెళ్లి పరామర్శించి అందరి హృదయాలను గెలుచుకున్నారు.
ఈ అరుదైన వ్యాధి కారణంగా శరీరంపై నియంత్రణ కోల్పోయి, నడవడానికి కూడా ఇబ్బంది పడుతున్న సదరు అభిమాని వద్దకు వెళ్లిన రామ్.. ఆమెతో కాసేపు ఎంతో ఆప్యాయంగా ముచ్చటించారు. ఆమె ఆరోగ్య పరిస్థితి గురించి అడిగి తెలుసుకోవడమే కాకుండా, జీవితంలో ధైర్యంగా ముందుకు సాగాలని కొండంత అండగా నిలిచారు. ఆమెతో కలిసి సరదాగా ముచ్చటిస్తూ జ్ఞాపకంగా కొన్ని అద్భుతమైన ఫోటోలు దిగారు. ఎవరూ ఊహించని విధంగా తన అభిమాన హీరో నేరుగా ఇంటికే వచ్చేసరికి ఆ యువతి, ఆమె కుటుంబ సభ్యులు భావోద్వేగానికి గురయ్యారు.
రామ్ పోతినేని చేసిన ఈ మానవీయ ప్రయత్నం ఇప్పుడు సోషల్ మీడియా వేదికగా విపరీతంగా వైరల్ అవుతోంది. అభిమానుల పట్ల రామ్కు ఉన్న నిరుపమానమైన ప్రేమ, బాధ్యతను చూసి నెటిజన్లు, సినీ ప్రముఖులు ఆయనపై ప్రశంసల వర్షం కురిపిస్తున్నారు. రీల్ లైఫ్లోనే కాదు రియల్ లైఫ్లోనూ రామ్ నిజమైన హీరో అంటూ అభిమానులు గర్వంగా పోస్ట్లు పెడుతున్నారు. ప్రస్తుతం రామ్ చూపించిన ఈ గొప్ప మనసు ఇండస్ట్రీలో ఒక హాట్ టాపిక్గా నిలిచింది.
