కొత్తగా ఏర్పాటైన ‘తెలంగాణ రక్షణ సేన’ (టీఆర్ఎస్) పార్టీ అధ్యక్షురాలు కల్వకుంట్ల కవిత రేపు (శనివారం) మీడియా ముందుకు రానున్నారు. హైదరాబాద్ బషీర్బాగ్లోని సురవరం ప్రతాపరెడ్డి ఆడిటోరియంలో ఉదయం 11 గంటలకు తెలంగాణ రాష్ట్ర వర్కింగ్ జర్నలిస్టుల సంఘం (టీయూడబ్ల్యూజే) ఆధ్వర్యంలో నిర్వహించనున్న ‘మీట్ ది ప్రెస్’ కార్యక్రమంలో ఆమె పాల్గొంటారు. పార్టీ స్థాపించిన తర్వాత కవిత అధికారికంగా మీడియా సమావేశంలో పాల్గొనడం ఇదే తొలిసారి కావడంతో రాజకీయ వర్గాల్లో ఆసక్తి నెలకొంది.
ఈ సందర్భంగా తెలంగాణ భవిష్యత్తుపై తన పార్టీ విజన్ను, రాష్ట్ర ప్రగతి కోసం రూపొందించిన సమగ్ర రోడ్మ్యాప్ను కవిత వివరించనున్నారు. ఈసీ ఆమోదంతో ‘తెలంగాణ రక్షణ సేన’గా రూపుదిద్దుకున్న తన పార్టీ లక్ష్యాలను, భవిష్యత్ కార్యాచరణను జర్నలిస్టుల సాక్షిగా ఆమె పంచుకోనున్నారు. కొత్త పార్టీ స్థాపన వెనుక ఉన్న ఉద్దేశాలను, రాబోయే రోజుల్లో ప్రజల్లోకి ఎలా వెళ్లబోతున్నారనే విషయాలను ఈ సమావేశంలో స్పష్టం చేయనున్నారు.
తెలంగాణ రాజకీయాల్లో చోటు చేసుకుంటున్న తాజా పరిణామాల నేపథ్యంలో కవిత ప్రెస్ మీట్ ప్రాధాన్యత సంతరించుకుంది. పార్టీ విధానాలు, ఇతర రాజకీయ పక్షాల పట్ల తమ వైఖరి ఏంటనేది ఆమె వెల్లడించే అవకాశం ఉంది. ఈ సమావేశం ద్వారా రాష్ట్ర అభివృద్ధిపై కవిత చేయబోయే ప్రకటనల కోసం అటు రాజకీయ విశ్లేషకులు, ఇటు ప్రజలు ఆసక్తిగా ఎదురుచూస్తున్నారు.
