పంజాబ్ ముఖ్యమంత్రి భగవంత్ మాన్ రాష్ట్ర అసెంబ్లీకి మద్యం సేవించి వచ్చారంటూ బీజేపీ, కాంగ్రెస్ పార్టీలు తీవ్ర స్థాయిలో ఆరోపణలు గుప్పించాయి. పంజాబ్ను మత్తు పదార్థాల రహిత రాష్ట్రంగా మారుస్తానని వాగ్దానం చేసిన ముఖ్యమంత్రే ఇలా ప్రజాస్వామ్య దేవాలయంలో మద్యం మత్తులో తూలడం అత్యంత దారుణమని, ఇది పంజాబ్ ప్రతిష్టను ప్రపంచ స్థాయిలో దెబ్బతీస్తోందని ఇరు పార్టీల నేతలు మండిపడ్డారు. ముఖ్యమంత్రి తన నిర్దోషిత్వాన్ని నిరూపించుకోవాలని ప్రతిపక్షాలు డిమాండ్ చేశాయి.
ఢిల్లీ బీజేపీ అధ్యక్షుడు వీరేంద్ర సచ్దేవా ఈ ఘటనపై స్పందిస్తూ, రాజ్యాంగంపై ప్రమాణం చేసిన వ్యక్తి ఇలా వ్యవహరించడం సిగ్గుచేటని విమర్శించారు. పంజాబ్ యువతను సీఎం మాన్ తప్పుదోవ పట్టిస్తున్నారని, ఆమ్ ఆద్మీ పార్టీ సంస్కృతి ఇదేనని ఆరోపించారు. కాంగ్రెస్ నేత ప్రతాప్ సింగ్ బజ్వా మాట్లాడుతూ, దేశ చరిత్రలో ఒక ముఖ్యమంత్రిపై ఇలాంటి ఆరోపణ రావడం ఇదే తొలిసారి అని, దీనిపై ఆయన వివరణ ఇవ్వకపోవడం ఆరోపణలకు బలం చేకూరుస్తోందని పేర్కొన్నారు.
అయితే, ఈ రాజకీయ రచ్చ మరియు తీవ్ర విమర్శల మధ్యే పంజాబ్ అసెంబ్లీలో ముఖ్యమంత్రి భగవంత్ మాన్ ప్రవేశపెట్టిన విశ్వాస తీర్మానం ఏకగ్రీవంగా నెగ్గడం గమనార్హం. ప్రతిపక్షాలు ఆయన వ్యక్తిగత ప్రవర్తనపై దాడి చేస్తున్నప్పటికీ, సభలో ఆయన ప్రభుత్వం తన బలాన్ని నిరూపించుకుంది. ఈ పరిణామాల నేపథ్యంలో పంజాబ్ రాజకీయం ఒక్కసారిగా వేడెక్కింది.
