హైదరాబాద్లోని చాదర్ఘాట్ పోలీస్ స్టేషన్ పరిధిలో కుటుంబ కలహాలు ఒక నిండు ప్రాణాన్ని బలిగొన్నాయి. పోలీసులు తెలిపిన వివరాల ప్రకారం.. ఉస్మాన్పురాకు చెందిన సఫ్దర్ హుస్సేన్ అనే వ్యక్తి మద్యానికి బానిసై తరచూ ఇంట్లో గొడవ పడేవాడు. ఏప్రిల్ 14 రాత్రి కుటుంబ సభ్యులతో గొడవకు దిగిన సఫ్దర్, మరుసటి రోజు (ఏప్రిల్ 15) తెల్లవారుజామున 5 గంటల సమయంలో మళ్ళీ తన తల్లి మరియు అన్న హషీమ్ హుస్సేన్తో వాగ్వాదానికి దిగి వారిని బెదిరించాడు.
ఈ క్రమంలో తీవ్ర ఆగ్రహానికి లోనైన అన్న హషీమ్ హుస్సేన్, తన తమ్ముడు సఫ్దర్ హుస్సేన్పై కత్తితో దాడి చేశాడు. ఈ దాడిలో సఫ్దర్ గొంతుకు తీవ్ర గాయమై అక్కడికక్కడే మృతి చెందాడు. చాదర్ఘాట్లోని ఒక ఐస్ ఫ్యాక్టరీ పార్కింగ్ ప్రాంతంలో మృతదేహం లభ్యమైంది. సమాచారం అందుకున్న పోలీసులు వెంటనే ఘటనా స్థలానికి చేరుకుని, మృతదేహాన్ని పోస్టుమార్టం నిమిత్తం తరలించి కేసు నమోదు చేశారు.
ఈ హత్యకు సంబంధించి దర్యాప్తు చేపట్టిన చాదర్ఘాట్ పోలీసులు, నిందితుడైన హషీమ్ హుస్సేన్ (26)ను ఏప్రిల్ 16న అదుపులోకి తీసుకున్నారు. నిందితుడిని నాంపల్లిలోని గౌరవనీయ VIII ACJM కోర్టులో హాజరుపరచనున్నట్లు ఇన్స్పెక్టర్ కె. బ్రహ్మ మురారి మీడియాకు తెలిపారు. మద్యానికి బానిసవ్వడం మరియు క్షణికావేశం ఒకే కుటుంబంలో విషాదాన్ని నింపాయని స్థానికులు ఆవేదన వ్యక్తం చేస్తున్నారు.
