ప్రముఖ దర్శకుడు సుకుమార్ తన సొంత నిర్మాణ సంస్థ ‘సుకుమార్ రైటింగ్స్’ ద్వారా వైవిధ్యమైన కథలను ప్రోత్సహిస్తూ చిన్న సినిమాలను నిర్మిస్తున్నారు. ఇటీవల కాలంలో తెలుగు వెండితెరపై ‘బలగం’ వంటి తెలంగాణ మట్టి కథలు ఘనవిజయం సాధిస్తున్న తరుణంలో, సుకుమార్ కూడా అదే బాట పట్టారు. నిర్మాత బన్నీ వాస్తో కలిసి తెలంగాణ సంస్కృతి, సంప్రదాయాల నేపథ్యంలో ఒక సరికొత్త చిత్రాన్ని నిర్మించేందుకు ఆయన సిద్ధమయ్యారు.
ఈ క్రేజీ ప్రాజెక్టులో ‘బలగం’ చిత్రంతో నటుడిగా మంచి గుర్తింపు తెచ్చుకున్న ప్రియదర్శి కథానాయకుడిగా నటించనున్నారు. ఒక నూతన దర్శకుడు ఈ చిత్రం ద్వారా వెండితెరకు పరిచయం కాబోతున్నారని సమాచారం. ఇప్పటికే ‘వృషఖర్మ’, ‘పెద్ది’ వంటి భారీ చిత్రాలకు నిర్మాణ భాగస్వామిగా ఉన్న సుకుమార్, ఇలాంటి సహజసిద్ధమైన కథలతో చిన్న సినిమాలను నిర్మించడంపై సినీ వర్గాల్లో ప్రశంసలు వ్యక్తమవుతున్నాయి.
తెలంగాణ పల్లెటూరి నేపథ్యంతో సాగే ఈ భావోద్వేగపూరిత చిత్రానికి సంబంధించిన పూర్తి వివరాలను త్వరలోనే అధికారికంగా ప్రకటించనున్నారు. గతంలో తెలంగాణ నేపథ్యంలో వచ్చిన సినిమాలు బాక్సాఫీస్ వద్ద కాసుల వర్షం కురిపించడమే కాకుండా ప్రేక్షకులను ఎంతగానో అలరించాయి. అదే రీతిలో ప్రియదర్శి హీరోగా రాబోతున్న ఈ చిత్రం కూడా మంచి విజయాన్ని అందుకుంటుందని చిత్ర యూనిట్ ఆశాభావం వ్యక్తం చేస్తోంది.
