ప్రముఖ సినీ నటుడు, నిర్మాత బండ్ల గణేశ్ ఇంట్లో పెళ్లి సందడి మొదలైంది. ఆయన కుమార్తె జనని నిశ్చితార్థ వేడుక ఆదివారం ఉదయం హైదరాబాద్లో అత్యంత వైభవంగా జరిగింది. పశ్చిమ గోదావరి జిల్లాకు చెందిన సూర్యతేజతో జనని వివాహం నిశ్చయమైంది. ఈ వేడుకకు ఇరు కుటుంబ సభ్యులతో పాటు రాజకీయ, సినీ రంగానికి చెందిన ప్రముఖులు పెద్ద సంఖ్యలో హాజరై కాబోయే వధూవరులను ఆశీర్వదించారు.
ఈ వేడుకలో మాజీ ఉపరాష్ట్రపతి ముప్పవరపు వెంకయ్యనాయుడు ప్రత్యేక ఆకర్షణగా నిలిచారు. ఆయనతో పాటు విజయవాడ మాజీ ఎంపీ లగడపాటి రాజగోపాల్ మరియు తెలుగు రాష్ట్రాలకు చెందిన పలువురు రాజకీయ నేతలు విచ్చేశారు. బండ్ల గణేశ్కు పరిశ్రమలో ఉన్న సాన్నిహిత్యంతో రాజకీయ ప్రముఖులు తరలిరావడంతో నిశ్చితార్థ వేడుక సందడిగా మారింది.
సినీ రంగం నుండి దర్శకేంద్రుడు కె. రాఘవేంద్రరావు, హాస్య బ్రహ్మ బ్రహ్మానందం, దర్శకుడు శ్రీను వైట్ల, నటుడు శివాజీ, రచయిత కోన వెంకట్, నిర్మాత సి. కల్యాణ్ తదితరులు హాజరయ్యారు. జనని, సూర్యతేజల నిశ్చితార్థానికి సంబంధించిన ఫోటోలు ప్రస్తుతం సోషల్ మీడియాలో వైరల్ అవుతున్నాయి. అభిమానులు, నెటిజన్లు కొత్త జంటకు శుభాకాంక్షలు తెలుపుతున్నారు.
