మంగళగిరిలోని టీడీపీ కేంద్ర కార్యాలయంలో అంతర్జాతీయ కార్మిక దినోత్సవ వేడుకలు ఘనంగా నిర్వహించారు. ఈ సందర్భంగా కార్మిక శాఖ మంత్రి వాసంశెట్టి సుభాష్ భవన నిర్మాణ కార్మికుల కోసం గత ప్రభుత్వం రద్దు చేసిన అన్ని సంక్షేమ పథకాలను పునరుద్ధరిస్తున్నట్లు కీలక ప్రకటన చేశారు. కార్మికుల సౌకర్యార్థం రాష్ట్రంలోని 15 ప్రధాన నగరాల్లో అత్యాధునిక ‘ఇంటిగ్రేటెడ్ లేబర్ ఎమినిటీస్ సెంటర్లు’ (లేబర్ అడ్డాలు) ఏర్పాటు చేయాలని ప్రభుత్వం నిర్ణయించినట్లు ఆయన వెల్లడించారు.
గత వైసీపీ ప్రభుత్వం అనుసరించిన కార్మిక వ్యతిరేక విధానాల వల్ల భవన నిర్మాణ రంగం కుదేలైందని, ఇసుక కొరతతో లక్షలాది మంది కార్మికులు ఉపాధి కోల్పోయారని మంత్రి విమర్శించారు. అసంఘటిత రంగ కార్మికులు ‘ఈ-శ్రమ’ పోర్టల్లో నమోదు చేసుకోవడం ద్వారా రూ. 20 లక్షల వరకు ప్రమాద బీమా సాయం పొందవచ్చని సూచించారు. రాష్ట్రవ్యాప్తంగా కొత్త ఈఎస్ఐ ఆసుపత్రులు, మెడికల్ కాలేజీల ఏర్పాటు ద్వారా కార్మికులకు మెరుగైన వైద్యం అందిస్తామని స్పష్టం చేశారు.
ఈ కార్యక్రమంలో టీఎన్టీయూసీ నాయకులు, పలువురు ఎమ్మెల్యేలు పాల్గొని కార్మిక హక్కుల రక్షణకై తమ నిబద్ధతను చాటారు. జగన్ పాలనలో పరిశ్రమలు తరలిపోవడం వల్ల ఉపాధి అవకాశాలు దెబ్బతిన్నాయని, ఇప్పుడు కూటమి ప్రభుత్వం పరిశ్రమలను రప్పించి కార్మికులకు చేతినిండా పని కల్పిస్తుందని నేతలు పేర్కొన్నారు. అనంతరం మంత్రి సుభాష్ టీఎన్టీయూసీ జెండాను ఆవిష్కరించి, సీనియర్ కార్మికులను ఘనంగా సత్కరించారు.
