విమాన ప్రయాణాల్లో కనెక్టింగ్ ఫ్లైట్ మిస్ అవ్వడం అనేది చాలా మందిని ఆందోళనకు గురిచేసే అంశం. అయితే, మీ ప్రయాణం మొత్తం ఒకే టికెట్పై (సింగిల్ PNR) బుక్ చేసినప్పుడు, ఎయిర్లైన్ ఆలస్యం కారణంగా మీరు రెండో విమానాన్ని అందుకోలేకపోతే ఆ బాధ్యత పూర్తిగా విమానయాన సంస్థదే అవుతుంది. ఇలాంటి సందర్భాల్లో సదరు సంస్థ మీకు ఉచితంగా తర్వాతి విమానంలో ప్రయాణ సౌకర్యం కల్పించడంతో పాటు, నిబంధనల ప్రకారం ఇతర వసతులను కూడా అందించాల్సి ఉంటుంది.
ఒకే టికెట్పై ప్రయాణిస్తున్నప్పుడు ఫ్లైట్ మిస్ అయితే, ఎయిర్లైన్ సంస్థ మీకు ఉచితంగా టికెట్ రీబుకింగ్ చేయాలి. ఒకవేళ తర్వాతి విమానం కోసం ఎక్కువ సమయం వేచి చూడాల్సి వస్తే, ప్రయాణికులకు భోజన వోచర్లు, అవసరమైతే హోటల్ బస మరియు రవాణా సౌకర్యాలను కూడా ఎయిర్లైన్ అందించాలి. విమానం ఆలస్యం కావడం, సెక్యూరిటీ చెక్ లేదా ఇమ్మిగ్రేషన్ క్యూల వల్ల ప్రమేయం లేకుండా ఆలస్యమైతేనే ఈ ప్రయోజనాలు వర్తిస్తాయి.
అయితే, ఈ రూల్స్ వర్తించాలంటే కొన్ని పరిమితులు ఉన్నాయి. వేర్వేరు టికెట్లు (వేర్వేరు PNR నంబర్లు) కొనుగోలు చేసినప్పుడు మొదటి ఫ్లైట్ ఆలస్యమైతే రెండో ఎయిర్లైన్ బాధ్యత వహించదు. అలాగే, ప్రయాణికులు స్వయంగా ఆలస్యంగా రావడం లేదా షాపింగ్ వంటి సొంత పనుల వల్ల ఫ్లైట్ మిస్ అయితే ఎలాంటి పరిహారం లభించదు. కాబట్టి, విదేశీ ప్రయాణాలు చేసేటప్పుడు ఒకే టికెట్పై బుక్ చేసుకోవడం వల్ల సమయం, డబ్బు మరియు టెన్షన్ నుంచి తప్పుకోవచ్చని నిపుణులు సూచిస్తున్నారు.
