హైదరాబాద్లోని రాజీవ్ గాంధీ అంతర్జాతీయ విమానాశ్రయం (ఆర్జీఐఏ) పోలీస్ అవుట్పోస్ట్లో అవినీతి నిరోధక శాఖ (ఏసీబీ) అధికారులు బుధవారం భారీ సోదాలు నిర్వహించారు. ఒక కేసులో చార్జిషీట్ వేయడానికి మరియు నిందితుల కుటుంబ సభ్యులను కేసు నుండి తప్పించడానికి రూ. 5 లక్షలు లంచం డిమాండ్ చేసిన ఇన్స్పెక్టర్ సంపత్ కనకయ్య, సబ్-ఇన్స్పెక్టర్ సిద్ధేశ్వర్లను ఏసీబీ అధికారులు రెడ్హ్యాండెడ్గా పట్టుకున్నారు. రూ. 2 లక్షల అడ్వాన్స్ నగదును తీసుకుంటుండగా వీరిద్దరినీ అదుపులోకి తీసుకున్నారు.
ఈ అరెస్టుల అనంతరం ఇన్స్పెక్టర్ సంపత్ కనకయ్య నివాసంలో జరిపిన సోదాల్లో ఏసీబీ అధికారులకు భారీగా నగదు లభించింది. ఆయన ఇంట్లో దాచి ఉంచిన సుమారు రూ. 33.97 లక్షల నగదుతో పాటు పలు కీలక ఆస్తి పత్రాలను అధికారులు స్వాధీనం చేసుకున్నారు. విధులను దుర్వినియోగం చేస్తూ అక్రమంగా ఆస్తులు కూడబెట్టారనే ఆరోపణలపై వీరిద్దరిపై కేసులు నమోదు చేసి, నాంపల్లిలోని ఏసీబీ ప్రత్యేక కోర్టులో హాజరుపరిచినట్లు జాయింట్ డైరెక్టర్ వెల్లడించారు.
వరుసగా జరుగుతున్న ఈ దాడులు ప్రభుత్వ విభాగాల్లో కలకలం రేపుతున్నాయి. మంగళవారం కూడా రాజేంద్రనగర్ వ్యవసాయ వర్సిటీలో ఒక అధికారి లంచం తీసుకుంటూ పట్టుబడటాన్ని ఏసీబీ గుర్తుచేసింది. ప్రజలెవరైనా ప్రభుత్వ అధికారులు లంచం అడిగితే తక్షణమే 1064 టోల్-ఫ్రీ నంబర్కు ఫిర్యాదు చేయాలని అధికారులు విజ్ఞప్తి చేశారు. భద్రతా కారణాల దృష్ట్యా ఈ కేసులో ఫిర్యాదుదారుడి వివరాలను గోప్యంగా ఉంచినట్లు తెలిపారు.
