ఆమ్ ఆద్మీ పార్టీ (ఆప్) సీనియర్ నాయకుడు, రాజ్యసభ సభ్యుడు రాఘవ్ చద్ధాకు పార్టీ అధిష్టానం షాక్ ఇచ్చింది. రాజ్యసభలో పార్టీ డిప్యూటీ లీడర్ పదవి నుంచి ఆయన్ను తప్పించి, ఆ బాధ్యతలను అశోక్ మిట్టల్కు అప్పగించింది. అంతేకాకుండా, రాజ్యసభలో ఆప్ కోటా కింద చద్ధాకు మాట్లాడే సమయాన్ని కేటాయించవద్దని కోరుతూ పార్టీ అధిష్టానం సచివాలయానికి లేఖ రాయడం రాజకీయ వర్గాల్లో పెను సంచలనంగా మారింది. పార్టీ క్రమశిక్షణను ఉల్లంఘించారనే ఆరోపణల నేపథ్యంలోనే ఈ కఠిన నిర్ణయం తీసుకున్నట్లు తెలుస్తోంది.
ముఖ్యంగా అరవింద్ కేజ్రీవాల్, మనీష్ సిసోడియా మద్యం పాలసీ కేసులో క్లీన్ చిట్ పొందిన తర్వాత కూడా చద్ధా మౌనంగా ఉండటం పార్టీ వర్గాలను విస్మయానికి గురిచేసింది. గతంలో కేజ్రీవాల్ అరెస్ట్ అయిన సమయంలోనూ ఆయన బ్రిటన్లో చికిత్స పొందుతున్నాననే కారణంతో పార్టీ కార్యకలాపాలకు దూరంగా ఉన్నారు. కీలక సమయాల్లో చద్ధా అనుసరిస్తున్న ఒంటెత్తు పోకడలు, పార్టీ లైన్కు భిన్నంగా వ్యవహరించడం అధిష్టానానికి ఆగ్రహం కలిగించినట్లు సమాచారం. ఈ పరిణామాల నేపథ్యంలో ఆయన త్వరలో పార్టీని వీడి బీజేపీలో చేరుతారనే ప్రచారం కూడా సాగుతోంది.
ఒకప్పుడు కేజ్రీవాల్కు అత్యంత నమ్మకస్తుడిగా, పంజాబ్ ఎన్నికల వ్యూహకర్తగా పేరు తెచ్చుకున్న రాఘవ్ చద్ధాకు ఇప్పుడు ప్రాధాన్యత తగ్గడం పార్టీలో చర్చనీయాంశమైంది. స్వాతి మలివాల్ ఉదంతం తర్వాత పార్టీలో మరో కీలక నేత ఇలా వివాదాల్లో చిక్కుకోవడం ఆప్కు ఇబ్బందికరంగా మారింది. రాబోయే పంజాబ్ అసెంబ్లీ ఎన్నికల నాటికి చద్ధా భవిష్యత్తుపై స్పష్టత వచ్చే అవకాశం ఉంది. ప్రస్తుతానికి ఈ సంక్షోభంపై ఆయన అధికారికంగా స్పందించనప్పటికీ, ఆప్ లోపల అంతర్గత కుమ్ములాటలు ముదిరాయని రాజకీయ విశ్లేషకులు భావిస్తున్నారు.
