ఐఏఎస్ అధికారి రోనాల్డ్ రోస్ కేసులో పెద్ద ట్విస్ట్ చోటుచేసుకుంది. తెలంగాణ కేడర్కు కేటాయిస్తూ సెంట్రల్ అడ్మినిస్ట్రేటివ్ ట్రైబ్యునల్ (క్యాట్) ఇచ్చిన ఉత్తర్వులపై హైకోర్టు కీలక నిర్ణయం తీసుకుంది. క్యాట్ తీర్పును సవాల్ చేస్తూ కేంద్ర డివోపిటి హైకోర్టును ఆశ్రయించగా, బుధవారం హైకోర్టు ధర్మాసనం తాత్కాలిక స్టే జారీ చేసింది. దీనితో రోనాల్డ్ రోస్ కేడర్ కేటాయింపు వ్యవహారం మరోసారి సందిగ్ధంలో పడింది.
డివోపిటి చేసిన అప్పీల్ను చీఫ్ జస్టిస్ ఆపరేషన్ కుమార్ నేతృత్వంలోని ధర్మాసనం విచారించింది. గతేడాది అక్టోబర్లో డివోపిటి రోనాల్డ్ రోస్ను ఆంధ్రప్రదేశ్ కేడర్కు కేటాయిస్తూ ఉత్తర్వులు జారీ చేసింది. అయితే ఆ నిర్ణయాన్ని సవాల్ చేస్తూ రోసే క్యాట్లో పిటిషన్ దాఖలు చేయగా, స్థానికతను పరిగణనలోకి తీసుకుంటూ ఆయనను తెలంగాణ కేడర్కు కేటాయించాలని తీర్పు ఇచ్చింది.
క్యాట్ తీర్పును అంగీకరించని డివోపిటి మళ్లీ హైకోర్టు తలుపులు తట్టింది. కేంద్ర ప్రభుత్వ నియామక విధానాలకు క్యాట్ తీర్పు వ్యతిరేకంగా ఉందని వాదిస్తూ, హైకోర్టు సమక్షంలో స్టే కోరింది. రెండు పక్షాలు వినిపించిన వాదనలను పరిశీలించిన ధర్మాసనం క్యాట్ ఉత్తర్వుల అమలుపై తాత్కాలికంగా స్టే విధించింది. దీతో రోనాల్డ్ రోస్ ఏ రాష్ట్ర కేడర్కు చెందినవారన్న స్పష్టత మరికొంతకాలం నిలిచిపోయింది.
ఈ వ్యవహారంలో మరింత విచారణకు ఆరు వారాల తేదీని హైకోర్టు నిర్ణయించింది. అప్పీల్పై తదుపరి విచారణ అనంతరం తుది నిర్ణయం వెలువడే వరకు రోనాల్డ్ రోస్ కేడర్ విషయంలో అనిశ్చితి కొనసాగనుంది. కేంద్రం–క్యాట్ మధ్య తలెత్తిన ఈ న్యాయపరమైన వివాదం ఐఏఎస్ అధికారుల కేటాయింపుల వ్యవస్థపై మళ్లీ చర్చ మొదలయ్యేలా చేసింది. ఈ కేసు తుది తీర్పు ఇతర అధికారుల కేసులపై కూడా ప్రభావం చూపే అవకాశముందనే అభిప్రాయాలు వినిపిస్తున్నాయి.
