వరిపంట కోత సీజన్ వచ్చినా, విద్యుత్ శాఖ అధికారులు మాత్రం అలసత్వాన్ని వీడకుండా రైతులను నానా ఇబ్బందులకు గురిచేస్తున్నారని ఆరోపణలు వినిపిస్తున్నాయి. పంట పొలాల్లో వేలాడుతున్న విద్యుత్ తీగలను సరిచేయాలని వినతిపత్రాలు పెట్టినా, అధికారులు ముందుగా ఆఫీస్‌కు రావాలని మాత్రమే చెబుతున్నారని రైతులు ఆవేదన వ్యక్తం చేస్తున్నారు. సమస్యను తీవ్రంగా తీసుకోవాల్సిన సమయంలో అధికారుల ఈ నిర్లక్ష్య ధోరణి రైతుల నొప్పిని మరింత పెంచుతోంది.
సిద్దిపేట జిల్లా జగదేవపూర్ మండలంలోని మునిగడప, రాంనగర్, బస్వాపూర్ సహా పలు గ్రామాలు ప్రస్తుతం ఈ సమస్యతో తీవ్ర ఇబ్బందులు పడుతున్నాయి. పొలాల్లో కిందకు వేలాడే విద్యుత్ వైర్ల కారణంగా వరి పంట కోతకే ఆటంకం ఏర్పడింది. కోత యంత్రాలు వేలాడే తీగలకు తగులుతాయనే భయంతో, రైతులు కట్టెలు పెట్టి ప్రమాదం మధ్యలోనే కోత పనులు చేపట్టాల్సిన పరిస్థితి ఏర్పడింది.
రైతుల ప్రకారం, పలుమార్లు సమస్యను అధికారులు దృష్టికి తీసుకెళ్లినప్పటికీ, “ఫీల్డ్ ఎంక్వైరీ చేయను… ఆఫీసుకే వచ్చి కలవండి” అంటూ నిర్లక్ష్యంగా స్పందించినట్టు ఆరోపిస్తున్నారు. పత్రికల్లో వార్తలు వచ్చినా పని పూర్తవుతుందా అంటూ రైతులపై అధికారం చూపుతున్నట్టు సమాచారం. ప్రతిరోజూ వెంటాడే ఈ వేలాడే వైర్లు ప్రమాదానికి దారితీసే అవకాశం ఉందని రైతులు తీవ్ర ఆందోళన వ్యక్తం చేస్తున్నారు.
“వేలాడే వైర్ల వల్ల మా పంట కోత ఎంతో ప్రమాదంలో పడుతోంది, ఎప్పుడేం జరుగుతుందో భయం వేసింది” అని రైతు ఈదిలింగం ఆవేదన వ్యక్తం చేశారు. ఎన్నిసార్లు విద్యుత్ శాఖకు ఫిర్యాదు చేసినప్పటికీ స్పందన లేకపోవడంతో, వైర్ల కింద కట్టెలు పాతి ప్రమాదాన్ని పట్టించుకోకుండా పంట కోసుకున్నట్లు తెలిపారు. ఇప్పటికైనా అధికారులు లూజ్-వైరులను సరిచేసి, అవసరమైన చోట స్తంభాలను ఏర్పాటు చేసి రైతుల సమస్యలను తగ్గించాలని రైతులు డిమాండ్ చేస్తున్నారు.
