రాబోయే స్థానిక సంస్థల ఎన్నికలు అత్యంత ప్రశాంత వాతావరణంలో జరిగేలా చూడాలని బూర్గంపాడు ఎస్సై మేడ ప్రసాద్ కోరారు. ఎన్నికల కోడ్, భద్రతల పరిరక్షణలో భాగంగా గురువారం సారపాక ప్రధాన కూడలి వద్ద ఆయన తన సిబ్బందితో కలిసి పర్యవేక్షించారు.
ఈ సందర్భంగా అక్కడ ఉన్న వివిధ రాజకీయ పార్టీల నాయకులు, ముఖ్య కార్యకర్తలతో ఎస్ఐ మాట్లాడారు. ఎన్నికల సమయంలో ఎటువంటి అవాంఛనీయ సంఘటనలు జరగకుండా, ప్రజాస్వామ్య పద్ధతిలో ఎన్నికలు పూర్తయ్యేలా చూడాలని తెలిపారు.
గ్రామీణ స్థాయి నుండి మండల స్థాయి వరకు శాంతి భద్రతలకు విఘాతం కలిగిస్తే ఎలాంటి ఉపేక్ష ఉండదని స్పష్టం చేశారు. పోలీసుల సూచనలు పాటిస్తూ, ఎన్నికల నియమావళికి కట్టుబడి ఉండాలని, ప్రజలకు ఇబ్బంది కలగకుండా ప్రచారం చేయాలని సూచించారు.
సమస్యాత్మక ప్రాంతాల్లో పోలీసులు ప్రత్యేక నిఘా ఉంచారని, అందరూ బాధ్యతాయుతంగా వ్యవహరించాల్సిన అవసరం ఉందని ఎస్ఐ చెప్పారు. ఈ కార్యక్రమంలో ఎస్ఐతో పాటు పోలీస్ సిబ్బంది, పలు పార్టీ స్థానిక నాయకులు పాల్గొన్నారు.
