గవర్నర్ అధికారిక కార్యక్రమంలో అనుమతి లేకుండా నకిలీ విలేఖరి ప్రవేశించడంతో పెద్ద సంచలనం చోటుచేసుకుంది. జాతీయ మీడియా సంస్థల పేర్లు, లోగోలు, యాక్సెస్‌ కార్డులను కచ్చితమైన నకిలీ రూపంలో తయారు చేసి తీసుకువచ్చిన ఓ వ్యక్తి విలేఖరి వేషంలో కార్యక్రమానికి చొరబడ్డట్టు తెలిసింది. ఆ వ్యక్తి కార్యక్రమ ప్రాంగణంలో స్వేచ్ఛగా కదలాడటాన్ని చూసి కొంతమంది నిజమైన విలేఖరులు అనుమానం వ్యక్తం చేశారు.
ఈ అనుమానాలు పెరిగిన తరువాత జాతీయ మీడియా ప్రతినిధులు అతడిని ప్రశ్నించగా అతని సమాధానాలు తడబాటుగా ఉండటం ద్వారా అసలు విషయం బయటపడింది. వెంటనే మీడియా ప్రతినిధులు ఈ ఘటనపై మదాపూర్ పోలీసులకు ఫిర్యాదు చేశారు. నిందితుడు తనను జాతీయ మీడియా విలేఖరిగా పరిచయం చేసుకుంటూ పలు ప్రభుత్వ కార్యక్రమాలకు హాజరవుతున్నాడని ఫిర్యాదులో తెలిపారు.
ఫిర్యాదు అందుకున్న పోలీసులు వెంటనే చర్యలోకి దిగి అతని వద్ద ఉన్న నకిలీ గుర్తింపు కార్డులు, వివిధ మీడియా సంస్థల లోగోలు, స్టిక్కర్లు, యాక్సెస్‌ కార్డులు వంటి సామగ్రిని స్వాధీనం చేసుకున్నారు. ఈ నకిలీ వస్తువులను ఎలా తయారు చేశాడు? వాటిని ఎక్కడి నుండి పొందాడు? ఇంతవరకు ఎన్ని కార్యక్రమాలకు చొరబడ్డాడు? అనే కోణాల్లో పోలీసులు దర్యాప్తు వేగవంతం చేశారు.
ఘటన వెలుగులోకి రావడంతో మీడియా వర్గాల్లో ఆందోళన నెలకొంది. ప్రభుత్వ అత్యున్నత స్థాయి సమావేశాలకు, భద్రత కీలకమైన కార్యక్రమాలకు ఇలా నకిలీ గుర్తింపులతో ప్రవేశించడం ఎంత ప్రమాదకరమో అనే చర్చ మొదలైంది. ఇలాంటి ఘటనలు పునరావృతం కాకుండా భవిష్యత్తులో మరింత కట్టుదిట్టమైన భద్రతా వ్యవస్థ ఉండాలంటూ మీడియా ప్రతినిధులు అభిప్రాయపడుతున్నారు.
