మానవ సంబంధాలు ప్రేమ, విశ్వాసం, అనురాగం వంటి భావోద్వేగాలపై నిలబడినా, వాటిని బలంగా నిలబెట్టేది ఆర్థిక స్థిరత్వమే అని నిపుణులు చెబుతున్నారు. గాలి, నీరు, ఆహారం లాగా మనుగడకు ఆర్థిక భద్రత కూడా అత్యవసరమని భావిస్తున్నారు. వ్యక్తి జీవితంలో ధనసంబంధిత భరోసా ఉంటేనే భావోద్వేగాలు సాఫీగా నడుస్తాయని, ఆర్థిక ఒత్తిడి పెరిగితే సంబంధాలలో విరామాలు రావడం సహజమని విశ్లేషణలు చెబుతున్నాయి. ఈ నేపథ్యంలో ప్రపంచ ప్రఖ్యాత Psychology Today మరియు YouGov సంస్థలు సంయుక్తంగా నిర్వహించిన తాజా సర్వే కూడా ఇదే విషయాన్ని మరోసారి స్పష్టం చేసింది.
ఈ సర్వేలో ముఖ్యంగా 18 నుంచి 45 సంవత్సరాల మధ్య వయస్సు కలిగిన 2,000 మందిని ప్రశ్నించగా, వారు వ్యక్తం చేసిన అభిప్రాయాలు ఎంతో ఆసక్తికరంగా ఉన్నాయి. భావోద్వేగ మద్దతు, ప్రేమ, ఆప్యాయతలు ముఖ్యమే అయినా వాటికి పునాది ఆర్థిక స్థిరత్వమే అని ఎక్కువశాతం మంది స్పష్టం చేశారు. ముఖ్యంగా వారి కనీస అవసరాలు తీర్చుకునేంత స్థాయి ఆర్థిక భరోసా లేకపోతే సంబంధాలు క్రమంగా దెబ్బతింటాయని వారు అభిప్రాయపడ్డారు.
సర్వేలో పాల్గొన్న మహిళల్లో 50% కంటే ఎక్కువ మంది ఆధునిక సంబంధాల్లో ఆర్థిక భద్రత అత్యంత కీలకమని పేర్కొనడం మరో ప్రధాన అంశంగా నిలిచింది. తమ భాగస్వామి ఉద్యోగాన్ని కోల్పోయి ఆర్థిక భద్రత ఇవ్వలేని స్థితి వస్తే, సంబంధాన్ని వదిలే అంశం గురించి ఆలోచిస్తామని మహిళలు ఒప్పుకోవడం నేటి సమాజంలో ఆర్థిక స్వావలంబనకు ఉన్న ప్రాధాన్యతను తెలియజేస్తోంది. ఇది సంబంధాలు భావోద్వేగాల ప్రాతిపదికపైనే కాక, ఆర్థిక భరోసాపైన కూడా ఆధారపడుతున్నాయని సూచిస్తోంది.
ఈ సర్వే ఫలితాలను విశ్లేషించిన నిపుణులు, వ్యక్తులకు ఆర్థిక స్థిరత్వం ఉన్నప్పుడు మాత్రమే వారు మానసికంగా, భావోద్వేగంగా హ్యాపీగా ఉంటారని, తమకు, తమ భాగస్వామికి భద్రమైన భవిష్యత్తును ఊహించగలరని అభిప్రాయపడ్డారు. ఆర్థిక భద్రత లేకపోతే ఒత్తిడి పెరిగి అనుబంధాలు బలహీనపడి సంబంధాలు విచ్ఛిన్నం కావచ్చని హెచ్చరించారు. కాబట్టి ప్రతి ఒక్కరూ తమ కనీస అవసరాలు తీర్చుకోగల ఆర్థిక నిర్మాణాన్ని ఏర్పరచుకోవడం జీవన నాణ్యతకు, సంబంధాల స్థిరత్వానికి ఎంత ముఖ్యమో నిపుణులు సూచించారు.
