కొద్ది రోజుల క్రితం బంగాళాఖాతంలో ఏర్పడిన మోంథా తుఫాను ఆంధ్రప్రదేశ్, తెలంగాణ రాష్ట్రాలకు తీవ్ర ప్రభావం చూపించింది. రాష్ట్రాలు ఇప్పుడే ఆ తుఫాన్ ప్రభావం నుంచి కోలుకున్నప్పటికీ, వాతావరణ శాఖ కొత్త అలర్ట్ జారీ చేసింది. రాబోయే వారం బంగాళాఖాతంలో మరో తుఫాన్ ఏర్పడే అవకాశం ఉందని నిపుణులు హెచ్చరించారు.
వాతావరణ నిపుణుల ప్రకారం, ఈ నెల 22న అండమాన్ సముద్రంలో అల్పపీడనం ఏర్పడటానికి పరిస్థితులు అనుకూలంగా ఉన్నాయి. ఈ అల్పపీడనం బంగాళాఖాతంలో బలపడుతూ పశ్చిమ–వాయవ్య దిశగా ప్రయాణించి ఆంధ్రప్రదేశ్, తమిళనాడు తీరాల వైపుకు చేరే అవకాశం ఉంది.
వాతావరణ శాఖ ప్రజలకు నవంబర్ 24 నుంచి 30 వరకు అప్రమత్తంగా ఉండాలని సూచించింది. అల్పపీడనం తుఫానుగా మారే అవకాశం ఉన్నందున, తీర ప్రాంతాల్లో భారీ వర్షాలు, బలమైన గాలులు, రవాణా అంతరాయాలు సంభవించవచ్చని హెచ్చరించారు.
మత్స్యకారులు సముద్రయాత్రలకు దూరంగా ఉండాలి. తీరప్రాంత ప్రజలు వాతావరణ శాఖ విడుదల చేసే సూచనలు, హెచ్చరికలను తప్పనిసరిగా పాటించాలని అధికారులు సూచించారు. అలాగే, సంబంధిత ప్రభుత్వ విభాగాలు సిద్ధంగా ఉండాలని సూచనలు ఇచ్చారు.
