మంత్రి పొన్నం ప్రభాకర్ ఆర్టీసీ ఉన్నతాధికారులతో సచివాలయంలో సమీక్షా సమావేశం నిర్వహించారు. మహాలక్ష్మి (Mahalakshmi) టికెట్ ద్వారా వచ్చిన ఆదాయమే కాకుండా టికెట్ యేతర ఆదాయంపై దృష్టి సారించాలని ఆదేశించారు. ఈ సమావేశంలో రాష్ట్రవ్యాప్తంగా పలు డిపోల నష్టాలకు కారణాలు, లాభాలను పెంచే చర్యలపై అధ్యయనం చేయడానికి ప్రత్యేక కమిటీ ఏర్పాటు చేయాలని సూచించారు.
నగరంలోని పెరుగుతున్న డిమాండ్ను దృష్టిలో పెట్టుకొని మంగళం నుండి భద్రాచలం వరకు రూట్లలో బస్సులను పెంచాలని, కొత్త కాలనీలకు అనుగుణంగా యాక్షన్ ప్లాన్ రూపొందించాలని మంత్రి ఆదేశించారు. ఈ సంవత్సరం ఇప్పటి వరకు 578 కొత్త బస్సులు రోడ్డెక్కినట్లు, భవిష్యత్తులో మరిన్ని బస్సులు రాబోతున్నాయని, వాటిని ప్రయాణికుల గరిష్ఠ అవసరాలున్న ప్రాంతాల్లో నడిపించాలని సూచించారు.
ఆర్టీసీలో ప్రమాదాలు తగ్గించడానికి డ్రైవర్ మానిటరింగ్ సిస్టం, నిరంతర శిక్షణ, మెడికల్ పరీక్షలను తప్పనిసరి చేయాలని మంత్రి సూచించారు. ప్రతి బస్సుకు ఇద్దరు డ్రైవర్ల నియామకం, అదనపు శిక్షణలతో రోడ్డు ప్రమాదాలను తగ్గించే చర్యలు చేపట్టాలని, రాష్ట్ర వ్యాప్తంగా ఆర్టీసీ ఉద్యోగులతో జూమ్ సమావేశాల ద్వారా అవగాహన కార్యక్రమాలు నిర్వహించాలని తెలిపారు.
ఫోర్త్ సిటీ బస్ టెర్మినల్ నిర్మాణం, మేడారం జాతర కోసం 3800 బస్సుల నిర్వహణ, ఉప్పల్ మరియు ఆరంఘర్ ప్రాంతాల్లో కొత్త టెర్మినల్స్ ఏర్పాటు వంటి ప్రాజెక్టులపై మంత్రి ఆదేశాలు ఇచ్చారు. తార్నాక హాస్పిటల్ లో డార్మిటరీ, ఆర్టీసీ ఫంక్షన్ హాల్స్ ఆదాయ-ఖర్చుల వివరాలను సమీక్షించి, మొత్తం ఆర్టీసీ సేవలు మరింత సమర్థవంతంగా, ప్రయాణికులకు సౌకర్యవంతంగా మారేలా చర్యలు తీసుకోవాలని స్పష్టం చేశారు.
