ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్ర యువతకు భారీ బహుమతిని ప్రకటించారు. మంచి ఆలోచనలతో ముందుకు వస్తే వారిని పారిశ్రామిక వేత్తలుగా తీర్చిదిద్దుతామని హామీ ఇచ్చారు. ప్రతి కుటుంబం నుంచి ఒక పారిశ్రామిక వేత్తను తయారు చేయడమే లక్ష్యమని స్పష్టం చేశారు. మంగళవారం ఆయన ప్రకాశం జిల్లా కనిగిరి నియోజకవర్గంలోని పెదఈర్లపాడులో ఏర్పాటు చేసిన MSME పార్కును ప్రారంభించారు. అదే సమయంలో రాష్ట్రంలోని 17 జిల్లాల్లో రూ.873 కోట్లతో 868 ఎకరాల్లో అభివృద్ధి చేసిన 49 MSME పార్కులకు వర్చువల్‌గా ప్రారంభోత్సవాలు, శంకుస్థాపనలు చేశారు.
ఈ సందర్భంగా సీఎం చంద్రబాబు మాట్లాడుతూ, 175 నియోజకవర్గాల్లో ప్లగ్ అండ్ ప్లే విధానంలో పారిశ్రామిక పార్కులను ఏర్పాటు చేయాలనే లక్ష్యంతో ప్రభుత్వం ముందుకు వెళ్తోందని చెప్పారు. ఈ పార్కుల ద్వారా లక్షలాది ఉద్యోగావకాశాలు సృష్టించబడతాయని పేర్కొన్నారు. చిన్న, మధ్య తరహా పరిశ్రమల ప్రోత్సాహంతో ఆర్థిక వ్యవస్థను బలోపేతం చేయడమే తమ ప్రాధాన్యత అని చెప్పారు. యువత ఆవిష్కరణాత్మక ఆలోచనలతో ముందుకు వస్తే, ప్రభుత్వం అన్ని విధాల మద్దతు ఇస్తుందని హామీ ఇచ్చారు.
రాష్ట్రంలో కూటమి ప్రభుత్వం ఏర్పడిన తర్వాత పెట్టుబడులు వెల్లువలా వస్తున్నాయని సీఎం తెలిపారు. ఇప్పటివరకు 99 కంపెనీలకు శంకుస్థాపనలు, ప్రారంభోత్సవాలు చేశామని వెల్లడించారు. ఈ సంస్థల ద్వారా సుమారు రెండు లక్షల మంది ఉపాధి పొందుతారని వివరించారు. పెట్టుబడిదారుల నమ్మకం తిరిగి రాష్ట్రంపై పెరుగుతోందని, ఇది అభివృద్ధి దిశగా ముఖ్యమైన అడుగని ఆయన అన్నారు.
విశాఖపట్నంలో నవంబర్ 14, 15 తేదీల్లో జరగబోయే సీఐఐ ఇంటర్న్‌షిప్ సదస్సులో రూ.10 లక్షల కోట్ల విలువైన పెట్టుబడి ఒప్పందాలు కుదుర్చుకోనున్నామని సీఎం చంద్రబాబు వెల్లడించారు. ఆంధ్రప్రదేశ్‌ను పారిశ్రామిక రంగంలో అగ్రస్థానంలో నిలపడం తమ ప్రధాన లక్ష్యమని పేర్కొన్నారు. రాష్ట్రంలో పెట్టుబడులు పెరగడంతో పాటు యువతకు మరిన్ని ఉపాధి అవకాశాలు కల్పించేందుకు ప్రభుత్వం కృషి చేస్తోందని ఆయన స్పష్టం చేశారు.
